13.5. Гамшгаас хамгаалах сургалтыг зохион байгуулахад Монголын улаан загалмай нийгэмлэг эрхлэх асуудлынхаа хүрээнд дэмжлэг үзүүлж, хамтран ажиллана.

24.3. Монголын улаан загалмай нийгэмлэг нь гамшгаас хамгаалах үйл ажиллагааг зохион байгуулах, хэрэгжүүлэхэд хууль тогтоомжийн хүрээнд нэмэлт хүч болон ажиллана.

39.4. Монголын улаан загалмай нийгэмлэг нь олон улсын Улаан загалмай, Улаан хавирган сар нийгэмлэг, холбоонд хандан гамшгаас хамгаалах хүмүүнлэгийн тусламж хүсэх, хүлээж авах, бүртгэх, байршуулах, хадгалах, тээвэрлэх, хуваарилах үйл ажиллагааг хууль тогтоомжийн хүрээнд хэрэгжүүлнэ.

• Малчдын бүлгүүдтэй хамтран ажиллаж, гамшгаас хамгаалах сургалтад хамруулах;
• Малчдыг өвөлжөөгөөр хангаж зудын эрсдэлийг бууруулах;
• Дунд шатны хороодоор дамжуулж малчдад өвс, тэжээл бэлтгэхэд тусламж үзүүлэх, эмзэг бүлгийн малчин өрхүүдэд өвс, тэжээлийн тусламж үзүүлэх;
• Орон нутгийн гал түймэртэй тэмцэх багуудыг байгуулж, мэргэжлийн сургалт болон техник хэрэгслээр хангах;
• Онцгой байдлын ерөнхий газартай хамтран гамшгаас урьдчилан сэргийлэх тухай мэдлэг олгох материалыг боловсруулж, түгээх;
• Гамшгийн бэлэн байдлыг хангах, эрсдэлийг бууруулахын тулд олон нийтийг хамарсан үйл ажиллагаа зохион байгуулах;

• Гамшиг, аюулт үзэгдлийн үед анхны тусламж, нийгэм-сэтгэл зүйн дэмжлэг үзүүлэх, нөхөн сэргээх үйл ажиллагаанд оролцож Гамшгаас хамгаалах хуулийн дагуу Онцгой байдлын ерөнхий газарт гамшгаас хамгаалах иж бүрэн дадлага, сургуулийг зохион байгуулахад дэмжлэг үзүүлэх чадавхи бүхий Үндэсний гамшигтай тэмцэх баг, Орон нутгийн гамшигтай тэмцэх багийг бэлтгэх;
• Гамшиг, яаралтай үед ашиглагдах нөөц санг бүрдүүлэх;
• Гамшиг, аюулт үзэгдлийн бэлэн байдлыг хангах сургалтыг сургуулиудад зохион байгуулж, үнэлгээнд үндэслэсэн гамшгийн үеийн аюулгүй байдлын төлөвлөгөөг гаргахад туслалцаа үзүүлэх;

• Гамшигт нэрвэгдсэн ард иргэдэд тусламж үзүүлэх:
  • Зуд буюу өвөлжилтийн хүнд нөхцөлд буй малчин өрхүүдэд бэлэн мөнгөний тусламж үзүүлэх;
  • Гамшигт нэрвэгдсэн ард иргэдэд яаралтай үеийн үнэлгээнд үндэслэн хүнсний болон хүнсний бус тусламж, нийгэм-сэтгэлзүйн дэмжлэг үзүүлэх;

• Гамшигт малаа алдсан малчин иргэдэд эх үүсвэрийг орлохуйц мэргэжил эзэмшүүлэх сургалт явуулах;
• Гамшигт өртсөн ард иргэдэд хүмүүнлэгийн тусламж үзүүлж, хэвийн амьдралд орох хугацааг богиносгох;

НҮБ-ын Ерөнхий ассамблейн 1989 онд гаргасан шийдвэрийн дагуу жил бүрийн 10 дугаар сарын 13-ны өдрийг дэлхий нийтээр “Гамшгийн эрсдэлийг бууруулах олон улсын өдөр”-ийг тэмдэглэн өнгөрүүлдэг. Иргэдийг аюулгүй амьдрах арга ухаанд сургаж дадлагажуулах, гамшгийн эрсдэлийг бууруулахад иргэд, олон нийтийн оролцоог хангах, гамшгийн эрсдэлийг бууруулахын ач холбогдлыг хүүхэд, залууст таниулах зорилгоор дэлхийн улс орнууд энэ өдөр нэгэн зорилго, уриан дор нэгддэг. Энэ жилийн хувьд Гамшгийн эрсдэлийг бууруулах Олон улсын өдрийг “Санхүүжилтийг гамшгийн үед зарцуулахаас илүү даван туулах чадавхийг бэхжүүлэхэд чиглүүлье”уриан дор тэмдэглэнэ. 

Гамшгийн эрсдэлийг бууруулах олон улсын өдрийг тохиолдуулан Монголын улаан загалмай нийгэмлэгээс “Гамшгийн эрсдэлийг бууруулахад эмэгтэйчүүдийн оролцоо” сэдэвт уулзалт, семинарыг орон нутгийн Дунд шатны хороодоор дамжуулан бүсчилсэн хэлбэрээр зохион байгуулж байна.

Энэ удаагийн бүсийн уулзалт Өвөрхангай аймагт боллоо. Бүсийн уулзалтад Өвөрхангай аймгийн Иргэдийн төлөөлөгчдийн хурлын нарийн бичгийн дарга, Монголын эмэгтэйчүүдийн холбооны Өвөрхангай аймаг дахь салбар зөвлөлийн дарга С.Ундрах, Арвайхээр сумын Засаг даргын тамгын газрын дарга Н.Ганчимэг, Өвөрхангай аймгийн Онцгой байдлын газрын орлогч дарга Ж.Хаш-эрдэнэ, Өвөрхангай аймгийн Улаан загалмайн хорооны дарга Б.Энхцогт, Сонгинохайрхан дүүргийн Улаан загалмайн хорооны дарга Г.Жавзандулам, Төв аймгийн Улаан загалмайн хорооны дарга Б.Отгончимэг оролцов.

Уулзалтад Өвөрхангай аймгийн 19 сумын төрийн болон төрийн бус байгууллагууд, олон улсын болон бизнесийн байгууллагууд, иргэд, сайн дурын идэвхтнүүд, тусгай хэрэгцээтэй иргэдийн төлөөлөл зэрэг олон талт оролцогчид нэгдэн оролцож, мэдээлэл солилцон, санал бодлоо хуваалцсан нь энэ чиглэлээр цаашид авах арга хэмжээний суурийг тавьсан юм.